स्वतंत्र बातमी

नाशिक शहरातील वाहतूक आणि पायाभूत सुविधांच्या कामांतर्गत द्वारका चौकातील गुरुत्ववाहिनीचे स्थलांतरण करण्यात आले होते. आता हे काम अंतिम टप्प्यात पोहोचले असून नवीन गुरुत्ववाहिनी विद्यमान वाहिनीशी जोडण्याचे क्रॉस-कनेक्शन काम पार पडणार आहे. या जोडणीदरम्यान सुरक्षिततेचा उपाय म्हणून पाण्याचा मुख्य प्रवाह बंद ठेवावा लागत आहे. त्याच वेळी शहरातील इतर विभागांमधील प्रलंबित तांत्रिक कामे हाताळण्याचे नियोजन महापालिकेने केले आहे. नाशिक पूर्व, नवीन नाशिक, नाशिक रोड, सातपूर आणि पंचवटी या सर्व विभागांतील लहान-मोठ्या समस्या एकाच दिवशी सोडवण्याचे उद्दिष्ट ठेवण्यात आले आहे.

नाशिकरोड विभागातील छत्रपती शिवाजी महाराज पुतळा परिसर आणि विहितगाव नवीन जलकुंभाशी संबंधित व्हॉल्व्ह बसवण्याचे काम प्रस्तावित आहे. गांधीनगर जलशुद्धीकरण केंद्रात ७०० मी.मी. व्यासाच्या कच्च्या पाण्याच्या पाइपलाइनवर नवीन व्हॉल्व्ह बसवण्यात येईल. याशिवाय ९०० मी.मी. गुरुत्व वाहिनीची दुरुस्ती आणि अमृत २.० योजनेअंतर्गत प्रभाग २१ मधील १५० मी.मी. व ४५० मी.मी. वाहिन्यांची जोडणी पूर्ण केली जाईल. सातपूर विभागातील पपया नर्सरी चौक, अशोक नगर जलकुंभाची नवीन पाइपलाइन जोडणी आणि जाधव संकुलातील कामे एकाच वेळी पार पडणार आहेत.