मुलींच्या ट्रेकिंग मोहिमेचा प्रारंभ

संरक्षण मंत्रालयाच्या वतीने एनसीसीच्या ‘अपराजिता – पारंग ला २०२६’ या मोहिमेचा प्रारंभ होणे ही देशातील महिला सक्षमीकरणाच्या प्रवासातील एक महत्त्वाची घडामोड आहे. २५० किलोमीटरचा अत्यंत कठीण, उंचावरील मार्ग पार करणे केवळ शारीरिकच नव्हे तर प्रचंड मानसिक कणखरतेची परीक्षा घेणारे आहे. तीनही सैन्य दलांच्या महिला अधिकाऱ्यांचे नेतृत्व आणि २८ कॅडेट्सचा सहभाग हा भारतीय लष्करातील महिलांच्या वाढत्या सहभागाचे उत्तम उदाहरण आहे. अशा उपक्रमांमुळे तरुण पिढीमध्ये राष्ट्रप्रेमासोबतच साहसी वृत्ती, शिस्त आणि स्व-प्रतिभेवर विश्वास निर्माण होण्यास मदत होते. हिमालयातील अत्यंत आव्हानात्मक परिस्थितीत ही मोहीम यशस्वीपणे पार पडून देशातील इतर हजारो मुलींना प्रेरणा देईल, यात शंका नाही.