स्वतंत्र बातमी

मध्य रेल्वेने छत्रपती शिवाजी महाराज टर्मिनस आणि सावंतवाडी रोड दरम्यान सुरू केलेली ही गाडी दररोज नियमितपणे धावणार आहे.

कोविड काळात दादर ते रत्नागिरी रेल्वेगाडी बंद करण्यात आली होती. त्यानंतर प्रशासनाने वक्तशीरपणा सुधारण्याच्या नावाखाली ही फेरी दिव्यापर्यंतच चालवण्याचा निर्णय घेतला होता. या निर्णयामुळे दक्षिण मुंबई, मध्य मुंबई, ठाणे आणि उपनगरांतील प्रवाशांना दिव्याला जाणे-येणे कठीण होत होते. प्रवासी संघटनांकडून ही गाडी दादर किंवा सीएसएमटीवरून पूर्ववत सुरू करण्याची मागणी सातत्याने केली जात होती. रेल्वे प्रशासनाने आता थेट छत्रपती शिवाजी महाराज टर्मिनस येथून सावंतवाडी रोडसाठी नवीन दैनिक गाडी मंजूर केली आहे. या गाडीला दादर, ठाणे, पनवेल, पेण, रोहा, माणगाव, वीर, खेड, चिपळूण, सावर्डे, आरवली रोड, संगमेश्वर रोड, रत्नागिरी, आडवली, विलवडे, राजापूर रोड, वैभववाडी रोड, नांदगाव रोड, कणकवली, सिंधुदुर्ग, कुडाळ आणि सावंतवाडी रोड या स्थानकांवर थांबे देण्यात आले आहेत.