विनस्पेस आणि स्पेसएक्स यांच्यात करार

व्हिएतनामने २००८ मध्ये ‘विनासॅट-१’ या पहिल्या सरकारी उपग्रहाचे यशस्वी प्रक्षेपण करून अंतराळ युगात प्रवेश केला होता. त्यानंतरच्या काळात सरकारी स्तरावर विविध उपग्रह सोडण्यात आले. २०२४ मध्ये देशाच्या सत्ताधारी कम्युनिस्ट पक्षाने राष्ट्रीय धोरणात मोठा बदल केला. त्यांनी अंतराळ तंत्रज्ञानाला ‘राष्ट्रीय धोरणात्मक तंत्रज्ञान’ म्हणून औपचारिक मान्यता दिली. सागरी सीमा आणि भूगर्भातील संशोधनाइतकेच अंतराळ क्षेत्राला प्राधान्य देण्याचे प्रशासकीय निर्देश जारी करण्यात आले. या सरकारी धोरणाचा फायदा घेत देशातील सर्वात मोठा औद्योगिक समूह असलेल्या ‘विनग्रुप’ने अंतराळ क्षेत्रात प्रवेश केला. नोव्हेंबर महिन्यात ‘विनस्पेस’ या खाजगी अंतराळ कंपनीची स्थापना करण्यात आली. एप्रिल महिन्यात या कंपनीने २०२७ पर्यंत स्वतःचा उपग्रह तयार करून प्रक्षेपित करण्याचे उद्दिष्ट जाहीर केले होते. आता स्पेसएक्स सोबत करार करून या दिशेने पहिले ठोस पाऊल उचलले आहे.