स्वतंत्र बातमी

राज्यातील विविध शाळांमध्ये प्रवेश घेण्यासाठी बालकांच्या वयाची कोणतीही एकसमान नियमावली नव्हती. आता शासनाने टप्प्याटप्प्याने लागू होणारा नवीन नियम जाहीर केला आहे.

केंद्र शासनाच्या निर्देशानुसार आणि राष्ट्रीय शैक्षणिक धोरण-२०२० च्या प्रभावी अंमलबजावणीसाठी राज्य शासनाने हा निर्णय घेतला आहे. पूर्वी राज्य मंडळाच्या शाळा आणि इतर राष्ट्रीय तसेच आंतरराष्ट्रीय बोर्डाच्या शाळांमध्ये प्रवेश वयाबाबत वेगवेगळे निकष पाळले जात होते. यामुळे पालकांमध्ये आणि बालकांच्या प्रवेश प्रक्रियेत मोठा गोंधळ उडत होता. आता शैक्षणिक वर्ष २०२७-२८ पासून बालवाटिका-१ अर्थात नर्सरी प्रवेशासाठी तीन वर्षे वय पूर्ण असणे सक्तीचे केले आहे. त्यानंतर २०२८-२९ मध्ये चार वर्षे, २०२९-३० मध्ये पाच वर्षे आणि २०३०-३१ मध्ये इयत्ता पहिलीच्या प्रवेशासाठी सहा वर्षे पूर्ण असणे अनिवार्य करण्यात आले आहे. आधीपासूनच प्राथमिक वर्गात शिक्षण घेत असलेल्या नियमित विद्यार्थ्यांना या बदलाचा कोणताही फटका बसणार नाही. शाळांच्या मुख्याध्यापकांना प्रवेश देताना १५ दिवसांपर्यंतची किरकोळ सूट देण्याचा अधिकार बहाल करण्यात आला आहे. प्राथमिक शिक्षण संचालनालयाकडून लवकरच सविस्तर मार्गदर्शक सूचना जारी केल्या जाणार आहेत.