स्वतंत्र बातमी

मुंबईच्या इतिहासात बीडीडी चाळींचे स्थान अनन्यसाधारण राहिलेले आहे. ब्रिटीशकालीन १६० चौरस फुटांच्या खोल्यांमध्ये पिढ्यानपिढ्या राहणाऱ्या कुटुंबांना ५०० चौरस फुटांची मोफत घरे मिळणे ही ऐतिहासिक घटना मानली पाहिजे. म्हाडाने बांधलेल्या ३२ मजली इमारतींचे काम पूर्ण होऊन दसऱ्याला ताबा मिळणे हा या प्रकल्पातील महत्त्वाचा टप्पा आहे. एवढ्या मोठ्या प्रमाणावर होणाऱ्या नागरी पुनर्विकासात रहिवाशांना वेळेत ताबा देणे ही मोठी प्रशासकीय यशोगाथा आहे. नायगाव आणि वरळी येथील प्रकल्पांच्या कामालाही अशीच गती मिळणे अपेक्षित आहे. पुनर्वसित इमारतींची देखभाल, लिफ्ट आणि पाणी पुरवठा या सेवा भविष्यात सुरळीत ठेवणे ही म्हाडा आणि स्थानिक सोसायट्यांची एकत्रित जबाबदारी राहील.