स्वतंत्र बातमी

शिक्षण विभागाचा ढिसाळ कारभार आणि शिक्षकांची दुरवस्था. मुंबई महापालिकेच्या शिक्षण विभागाचा नियोजनशून्य कारभार पुन्हा एकदा चव्हाट्यावर आला आहे. शैक्षणिक वर्षाचे पहिले सत्र संपत आले असताना शिक्षकांना नव्या अभ्यासक्रमाचे प्रशिक्षण देण्याची आठवण होणे हा अनास्थेचा कळस आहे. आधीच बीएलओ आणि एसआयआरच्या अशैक्षणिक कामांच्या ओझ्याखाली दबलेल्या शिक्षकांवर चार दिवसांच्या सक्तीच्या प्रशिक्षणाचा बोजा टाकला आहे. एका बाजूला निवडणूक अधिकारी लोकप्रतिनिधित्व कायद्यानुसार कारवाईची धमकी देत आहेत, तर दुसऱ्या बाजूला शिक्षण विभाग उपस्थितीची सक्ती करत आहे. अशा दुहेरी कात्रीत अडकलेल्या शिक्षकांनी वर्गात विद्यार्थ्यांना कधी शिकवायचे, हा मूलभूत प्रश्न निर्माण होतो. विद्यार्थ्यांना गुणवत्तेचे शिक्षण देणे हा समाजाचा प्राथमिक अधिकार आहे. प्रशासनाने तात्काळ समन्वय साधून शिक्षकांना बीएलओ कामातून मुक्त केले पाहिजे आणि प्रशिक्षणाचे नियोजन स्थानिक पातळीवर सुलभ केले पाहिजे, तरच पालिका शाळांमधील शिक्षणव्यवस्था वाचू शकेल.