स्वतंत्र बातमी

मुंबईत सार्वजनिक वाहतूक सेवेतील चालकांसाठी प्रादेशिक भाषेचे ज्ञान अनिवार्य करण्यावरून गेल्या काही महिन्यांपासून चर्चा सुरू आहे. १ जूनपासून परिवहन विभाग, कोकण मराठी साहित्य परिषद आणि मुंबई मराठी साहित्य संघ यांच्या संयुक्त विद्यमाने मोफत वर्ग चालवले जात होते. १५ ऑगस्टची मुदत संपल्यानंतर अचानक केंद्रे बंद झाल्याने आणि तपासणी पथकांकडून कडक चौकशी सुरू झाल्याने चालकांमध्ये संभ्रम निर्माण झाला. काही संघटनांनी आंदोलनाचा इशारा दिल्यानंतर प्रशासनाने मवाळ धोरण स्वीकारले. चालकांना मराठी बोलता यावे यासाठी प्रशासनाकडून प्रशिक्षण साहित्य पुरवले जात आहे. आगामी काळात ही मोहीम सर्व उपनगरांमध्ये विस्तारण्याची शक्यता आहे.